Shri shiv guru Stotram | श्री शिव गुरु स्तोत्रम्
श्रीशिवगुरुस्तोत्रम्
संविद्रूपाय शान्ताय शम्भवे सर्वसाक्षिणे ।
शेमुषी -सिद्धरूपाय शिवाय गुरवे नमः ॥ १॥
त्रैलोक्यसम्पदालेख्य -समुल्लेखनभित्तये ।
सच्चिदानन्दरूपाय शिवाय गुरवे नमः ॥ २॥
देशकालानवच्छिन्न -दृष्टिमात्रस्वरूपिणे ।
देशिकौघत्रयान्ताय शिवाय गुरवे नमः ॥ ३॥
विश्वात्मने तैजसाय प्राज्ञाय परमात्मने ।
विश्वावस्थाविहीनाय शिवाय गुरवे नमः ॥ ४॥
विवेकिनां विवेकाय विमर्शाय विमर्शिनाम् ।
प्रकाशानां प्रकाशाय शिवाय गुरवे नमः ॥ ५॥
परतन्त्राय भक्तानां स्वतन्त्राय दयालवे ।
विद्यावतारदेहाय शिवाय गुरवे नमः ॥ ६॥
पाशच्छेद -प्रवीणाय प्रपञ्चोपशमाय च ।
प्रणवाब्जपतङ्गाय शिवाय गुरवे नमः ॥ ७॥
नवाय नवरूपाय नवनादविलासिने ।
निरञ्जनपदेशाय शिवाय गुरवे नमः ॥ ८॥
संविन्मुद्राय भद्राय सर्वविद्याप्रदायिने ।
संवित्सिंहासनस्थाय शिवाय गुरवे नमः ” ॥ ९॥
सर्वागममोक्तिकलितं स्तोत्रं शिवगुरोः परम् ।
संवित्साधनसारांशं यः पठेत् सिद्धिभाग् भवेत् १०॥
इति श्रीशिवगुरुस्तोत्रं सम्पूर्णम् ।
Comments
Post a Comment